Philomene Corrigal



tapahtêyimowin (Humility)


*********



1. ôma âcimowin kâ-wî-âcimostâtân ê-kî-ispayik; pêyakwâw êkospî, niya, nikâwiy, nohtâwiy mîna nîcisânak ê-mâci-piciyâhk. kî-miyopayiwak êkospî omâcîwak sisonê sâkahikanihk ita ê-ministikoskâk.

2. ê-pimi-kîwêyâhk êkwa kâ-wâpamâyâhkik cahcâkiwak pêyakwayak mâna ita ohcitaw ê-tasihkêcik. sisonê ministikohk êkota ôki cahcâkiwak asiyatowak. mitoni kistatahamwak nanâtohk pîyêsîsak mîna kotakak pisiskiwak. katawasisiwak anihi cahcâkiwak ê- asicinâkosicik ministikohk. namôya ahpô mâh-mâmitonêyihtam tânisi ê-itôtahk nohcâwîs, kâ-mâci-pâh-pâskiswât anihi cahcâkiwa. êyikohk ê-nahâskwêt, sêmâk niyânan nipahêw êkota cahcâkiwa anihi.

3. koskohik nohcâwîsa awa nikâwiy ê-misi-kanawâpamât. "kwanita ê-mikoskâcihât pîkwac-âya," itwêw. "kwanita êkos îsi kâ-nipahacik cahcâkiwak, âhci ta-misi-yôtin," itêw. 

4.ê-akwâci-pôni-âpihtâ-kîsikâk pê-nôkwan ê-pê-misi-yîkwaskwahk pahkisimôtâhk. ispî êkwa ê-otâkosik ê-pimi-kîwêyâhk. âsay êkwa kâ-mâci-yôtihk. pêyakwayak wâsênamân wayawîyâstan wâskahikanisihk ohci. sôskwâc mistikwak ê-kâh-kawâsicik nanâtohk ê-itâskosihkik tâskôc ê-nâh-nâtohkokwâtêk akohp. êkwa mîna êyikohk ê- kimiwahk. 

5. nipihtokwêyâmonân wâskahikanihk êkwa ê-mâci-kâh-kiposakahamâhk wâsênamâna apahkwâsonêkin ohci. misi-kimiwan, kwanita kâ-pihtokwêciwahk nipiy sîpâ iskwâhtêmihk ohci. ê-kî-kawisimoyâhk êkwa âsay kêtahtawê nohtâwiy kâ-waniskâpahtât ê-nawacipitahk kotaka pahkwâsonêkin ê-akosakahahk kotakihk wâsênamânihk ê- yohtêyâstaniyik. kahkiyaw êkwa mîna ê-waniskâyâhk ê-wîcihâyâhk ta-sa-sîhtawipitahk kotaka wâsênamâna.

6. ê-wâpahk êkwa sôskwâc misiwê cîki wâsakâm ê-pimastêki maskosiya, mistikwa, nîpiya êkwa watihkwana. 

7. êkosi anima êyikohk ê-kî-isi-misi-yôtihk. êyikohk ê-kî-sohkiyôwêk mâna êkospî.