Glecia Bear manâcihitowin (compassion) ********** 1. kâ-kî-pâh-pimohtêyân mâna Loon Lake Community Health Representative (CHR) ê-itatoskêyân mêkwâc, nikî-wâh-wâpahtên mâna pêyak wâskahikan ê-pâh-pihkitêk. ninohtê-kiskêyihtên ôma awîna êkota ê-wîkit. êkosi nititohtân êkota pêyakwâw. nipakamahikân iskwâhtêmihk. kâ-wâpamak êkota Mr. Roundsky, namôya ê-wâpit êkwa mîna ê-pâh-pêyako-wîkit. 2."nimosôm," nititâw, "pakâci êkwa ê-kiskêyihtamân ôta ê-wîkiyan ka-pimi-kâh- kiyokâtin êkwa. Pwâmwayi sipwêhtêyân êkwa kihtwâm nika-paminawason êkwa nika- pêtân ka-pê-wîci-mîcisômitin, wâh-wîpac ayisk nipê-itohtân ôta Loon Lake, êkosi ê- itatoskêyân, ta-papâmi-nitawâpênikêyân askîhkâna." 3. nikîsisên mâna êkwa kahkiyaw kîkway mîciwin êkwa mâna ê-itohtatamawak Mr. Roundsky, mihcêtwâw nikî-mîcisonân mâna. âskaw wiyâs ê-nawacîyân, ê-itohtatamawak, ôma kîspin kâ-kiskêyihtamân ohpimê kâ-wî-itohtêyân. mêtoni kwayask ninâkatohkân nimosôm. 4. kêtahtawê pêyakwâw ê-nitawâpênikêyân mâka mîna, namôya nânitaw kâ- miskawak. êkota cîki ê-wîkicik pêyakwâyi kâ-nitawi-kakwêcimakik, "tâniwâ nimosôm." "namôya apiw, aspin Waterhen ê-itohtêt George," itwêw ana iskwêw kâ-pê-yohtênahk iskwâhtêm, "omisa pêyak êkotê ê-ayâyit, êkotê mâna ê-nitawi-âh-ayât âskaw." 5. êkosi nipapâmi-kiyokân êkwa nimâh-miyâskên nimosôm wîki. namôya kinwêsk âti, Waterhen kâ-itohtêyân, sêmâk ninitonawâwak, omisa wîkiyihk nititohtân, ê-kakwêcimak, "tâniwâ nimosôm? ê-kî-pêhtamân ôma aspin ôta ê-pê-ayât." 6. "awasâyihk ana ayâw, ê-ahkosit ana, kimosôm, ê-sâposohpinêt. kêkâc êkwa nîso ayamihêwi-kîsikâw," itwêyiwa ôhi omisa. nikiskinohtahik itê kâ-ayâyit, êkosi nititâw, "nimosôm, tânêhki mâka êkâ maskihkîwiyiniw kâ-nitawi-wâpamat." "nôsisim," itwêw nimosôm, mêtoni ê-nêsowihtâkosit. "namôya awiyak nikî-mamisîn." "tânêhki," nititâw, "okimâhkân nama cî ôta ayâw, êkoni ta-kî-wihtamawêwak ê-ahkosiyan. cêskwa, kâwi nika-pê-takohtân, nika-nitawi-wâpamâw Fred Martell (ê-okimâhkâniwit êkospî mêkwâc)." 7. mayaw ê-pêhtahk nimosôma ê-ahkosiyit, sêmâk okimâhkân nitawi-wâpamêw awiya ta-itohtahâyit ahkosiwikamikohk. nimiywêyihtên anima ispî ê-pêhtamân âsay êsa ê-kî- itohtahiht. 8. ahkosiwikamikohk êkwa mîna nikâh-kiyokawâw. âsay mîna êkotê nititohtatamawâw kîkway ta-mîcit tâskôc oskâc kâ-kî-nakiskawak, ayi mâna Loon Lake. miywêyihtam ani mâna nimosôm osâm êyikohk ê-kihtimêyihtahk mîciwin ahkosiwikamikohk. "namôya nicihkêyihtên ôma môniyâwi-mîciwin, nôsisim," itwêw. 9. mwêstas êkwa namôya ê-ohci-wâh-wâpamak nimosôm, kâ-itohtêyân Loon Lake, ninitawâpênikân mahti kî-takohtêt âsay. êkosi nipêhtên ê-kî-pakitiniht êsa êkwa ê-pa- pêhât awiya Waterhen ohci, ta-kîwêhtahikot. 10. "nimosôm, ê-pê-nitawâpênêtân ôma, mahti kî-pakitinikawiyan êkwa mahti ê-kî- nohtê-kîwêyan Loon Lake isi. êkotê ôma ê-wî-itohtêyân anohc," nititâw. "nipakitinikawin mâka nôsisim," itwêw, "wahwâ! tâpwê ninanâskomon, mâka namôya Loon Lake ninohtê- itohtân, ê-wî-tipahamâtohk ôma Waterhen, êkotê ôma ê-nohtê-itohtêyân." "êkosi nimosôm, kîspin êkotê kinohtê-itohtân, ka-itohtahitin. misawâc wâpahki Loon Lake nika-kî-itohtân," nititâw. mitoni nikiskêyihtên nimosôm ê-cihkêyihtahk. 11. ê-ati-sipwêhtêyâhk êkwa ahkosiwikamikohk ohci nimosôm kâ-kî-itwêt, "nôsisim mitoni ka-atamihin kîspin ta-nakîyan nânitaw atâwêwikamikohk kâwpwây-astotin ê-wî- atâwêstamâsoyân. mêkwâc ê-oskinîkêyân mâna ê-kî-ayâyân kâwpwây-astotin. mâka pêyakwâw okîskwêpêsak nîkihk ê-pê-itohtêcik kâ-ati-kimotamawicik nitastotin. êkosi namôya kihtwâm wihkâc nitohci-ayân aspin êkospî." 12. "âha," nititâw. "ka-ati-nakînaw Fred Clark otatâwêwikamikohk, mêkwâc êkospî kêyâpic ê-ayât, ka-miskênaw kâwpwây-astotin. tâpwê nimiskênân pêyak astotin mêtoni ê-nahiskahk nimosôm. nimosôm kâ-kakwêcimit, "tânisi ê-isinâkwahk ôma astotin," "kaskitêwâw," nititâw. "namôya! namôya êkosi ê-isinâkwahk nôsisim," itwêw. "ê- kaskitêwosâwâk," itwêw, "ê-oskinîkêyân kâkikê mâna êkosi ê-isinâkwahk kâwpwây-astotin nikî-ayân. 13.êkosi Bruce Campbell's êkwa atâwêwikamikohk nititohtânân êwako mîna mâna kâwpwây-ayiwinisa ê-kî-atâwâkêt. êkota êkwa nimiskênân ê-kaskitêwosâwâk kâwpwây- astotin, nimosôm ohci. mêtoni nahiskam! "êkwatowahk ôma kâ-nitawêyihtamân," itwêw nimosôm, nikanawâpamâw kwayask ê-ay-ispitahk êkwa ê-mâh-mîskonahk mêtoni ê- nahiskahk, ê-takahkâpêwit mîna. 14."nîsitanaw tahtwâpisk piko nitayâwâw nôsisim," itwêw nimosôm, "tâniyikohk ê- itakihtêk?" "nêmitanaw tahtwâpisk ayiwâk niyânan itakihtêw," nititâw. nikiskêyihtên nimosôm êkâ ta-kî-tipahahk êkwa anima astotin. ayihk, nititâw nimasinahikân ôma mâna ôta, nika-tipahên niya kitastotin. mêtoni êkwa nîsta nimiywêyihtên tâskôc pêyakwan nimosôm, ispî asoni ê-postiskahk otastotin. 15. ê-ati-sipwêhtêyâhk êkwa Waterhen isi kâ-tipahamâtohk, nitati-naskwênâw pêyak niwîcêwâkan ta-pê-wîcêwit. ispî êkwa Waterhen ê-takohtêyâhk nimîcinân paskwâw- mostoso-wiyâs kwayask ê-kî-nawacîhk. ê-kîsi-mîcisoyâhk êkwa nikakwêcimâw nimosôm mahti kîspin awiya ka-kî-kanawêyimikot, piko ayisk êkosi wîpac ta-ati-kîwêyân. "nôsisim," nititik, "kâya ka-otamihitin, misawâc namôya nânitaw, mihcêtiwak ôma ayisiyiniwak ta- kanawêyimicik." 16. ê-wî-ati-sipwêhtêyân ôma nimosôm kâ-têpwâsit, "cêskwa, nôsisim, âstam ôta." êkota êkwa kâ-itisahot nânitaw wâskahikanihk. êkwa êkota ohci anima mêskanâs ê- pimohtêyâhk niwîcêwâkan. namôya wâhyaw mîtos ta-nitonawâyâhk nîpisîs ê-tahkopitêk. tâpwê mwêhci êkota nimiskênân mîtosihk anima nîpisiy kâ-tahkopitêk nitotinên anima kâ- tahkopitêk nîpisiy, kâ-miskamân êkota apahkwâsonêkin ê-akwahpitêk, ê-sikopayik êkwa ê-pâh-pôskwâsik, kinwêsk êsa ê-kî-ohtastêk. nitotinên anima pêyak maskimocis pôti ôma êkota, kî-astêw miscikowacis ê-miywâsik sôskwêkinohk ê-ohci-wêwêkinikâtêk. pâh- pôskwêkipayin mâka osâm kinwêsk ê-kî-ohtastêk êsa. niyohtênên ôma miscikowacis êkota kî-apiw tipahamâtowi-pîwâpisk, tâpiskâkan, nimosôm êsa ê-kî-miyiht êkospî kâ-kî- masinahamihk kayâs tipahamâtowin. 17. kâ-kâh-kiskisiyân tânisi iskwayâc nimosôm ê-kî-isit kâh-kihtwâm nikiskisin ôma nôsisim, "namôya ka-kî-tipahamâtin kâ-isi-miyo-itôtawiyan êyikohk mîna ê-isi- kisêwâtisiyan; mîskoc awa ê-nitawêyimitân ta-ayâwat tâpiskâkan. ê-kî-miyikawiyân kayâs ê-okimâhkâniwiyân. êkosi ôma ê-wî-isi-tipahamâtân êyikohk kâ-miyo-pamihiyan ê- miyotêhêyan. ôtê nîkân ati mêtoni ta-mistakisiw awa tâpiskâkan," itwêw, "hay hay!"