Al Louarn (Le Renard)





Al louarn barvek a c'hlip, glip, glip, glip, glip er c'hoad!
Gwa konikled arall-vro! Lemm-dremm e zaoulagad!


Lemm e zent ha skañv e dreid hag e graban ruz-gwad!
Alan al louarn a c'hlip, glip, glip : argad! argad!


Ar Vretoned a welis 'lemmañ o c'hlavier dall,
N'eo ket war higolen Breizh met houarngen ar Gall.


Ar Vretoned a welis o vediñ er c'hadtir,
N'eo ket gant fizier dantek, met gant klezeier dir,


Ha n'eo ket gwinizh ar vro, ha n'eo ket hor segal,
Met pennou; blouc'h eus Bro-Saoz, pennou blouc'h eus Bro-C'hall


Ar Vretoned a welis o tornañ ed gant youc'h
Ken e lamme pallenou diwar ar pennou blouc'h.


Ha n'eo ket gant fustou prenn 'vac'he ar Vretoned,
Met gant sparrou houarnet ha gant treid ar mirc'hed.


Ur youc'hadenn a glewis, youc'hadenn ar peurzorn
Adalek Krec'h  Sant Mikael tre-betek traoñ Elorn,


Adalek ti Sant Weltras tre-betek Penn ar bed
Er pevar c'horn eus a Vreizh bezet al Louarn meulet!


Bezet kanmeulet al Louarn a amzer da amzer!
Bezet koun eus ar ganaouenn, bezet klemm ouzh ar c'haner!


Neb a ganas ar c'han-mañ n'e ganas ur wech all,
Dideodet, siwazh dezhañ! ma oa bet gant ar Gall;


Hogen mar d-eo dideodet ned eo ket digalon,
N'eo ket mank kennebeud-all 'vit saezhañ saezh an ton!