Emzivadez Lannuon







Er bloavezh-mañ mil c'hwec'h kant pevar-ugent trizek,
Er gêrig a Lannuon zo ur gwalleur c'hoarve'et;

Er gêrig a Lannuon en un ostaleri,
Da Berinaïg Migon a oa matezh enni.

"Aozet deomp-ni, ostizez, pep tra evit koaniañ:
Stlipoù fresk, ha kig rostet, ha gwin mat da evañ!"

P'o doe debret hag evet pep hini leizh e ler:
"Setu arc'hant, ostizez, kontet blank ha diner;

Setu arc'hant, ostizez, kontet blank ha diner;
Ho matezh gant ul letern, da zont d'hor c'has d'ar ger!"

Pa oant-i war an hent bras ur pennadig mat aet,
Ur gomz kuzh war-benn ar plac'h 'treze oa et laret.

"Plac'hig koant, ho tentigoù, ho tal hag ho tivjod,
A zo gwenn evel eon ar c'hoummoù, war an aod."

"Maltoterien, me ho ped, em lezet evel on,
Evel laket gant Doue, laket gant Doue on;

Ha pa ven kant gwech bravoc'h, ya, kant gwech bravoc'h c'hoazh,
Ne ven 'vidoc'h, aotronez, ne ven na well na wazh."

"Hervez ho komzoù mignon, va merc'hig, me a gred,
D'ar govant o teskiñ pred gant menec'h emaoc'h bet."

"D'ar govant o teskiñ preg e Begar n'emaon bet.
Na kennebeut e lec'h all, avat, gant kloareg 'bet;

Hogen, e-barzh em zi-me ha war oaled va zad,
Em eus graet, va aotronez, pep seurt menozioù mat."

"Taolet aze ho letern, ha c'hwezhet ho koulo;
Set' ur yalc'h leun a arc'hant, ma hoc'h eus c'hoant, he po."

"N'eo ket me eo 'r femelenn, a vez dre ruioù kêêr,
O kemeret daouzek blank ha c'hoazh triwec'h diner!

Me 'm eus da vreur ur beleg a gêr a Lannuon;
Mar klevfe pezh a leret, 'rannafe e galon.

Me ho ped, maltoterien, pezet ar vadelezh
D'am zeurel e-kreiz ar mor kent e'it kement a c'hloez!

Me ho ped, ma aotronez, kent e'it kement ' c'hlac'har,
Kemeret ar vadelezh d'am lakat bev an douar."

Perinañ ' doe ur vestrez karget a vadelezh,
A chomas war an oaled da c'hortoz he matezh;

"Savet 'ta, tra dibreder, savet 'ta, senesal,
Da vont da sikour ur plac'h, en he gwad o neuial."

E-kichen kroaz Sant Jozef oa bet kavet maro;
He letern en he c'hichen, ha beo he goulo.







"kent e'it kement a c'hloez": a-raok kement a c'hloaz