Breve Hestoria de la Xunta
La Xunta pola Defensa de la Llingua Asturiana naz n'Uviéu, cuando nel añu 1984 s'aconceyó un bon grupu de xente pa entamar una organización, plural, unitaria y democrática que pudiere tar abierta a les aportaciones de cualquier persona esmolecida por topar un camín de salida a l'abegosa situación del asturianu. D'entós pa cá, la Xunta convirtióse nel referente de vindicación llingüística n'Asturies, coles sos campañes, manifestaciones, charles, conciertos y entrevistes que se faen ininterrumpidamente. Nel añu 1995, coincidiendo cola masiva manifestación na que nes cais d'Uviéu más de 10.000 persones piden la oficialidá de la llingua, la Xunta da un reblagu perimportante na so implantación social y númberu d'afiliaos, dotase d'una nueva organización interna y fai la so primer publicación, el "Llibru blancu de la recuperación y normalización llingüística d'Asturies" que tien gran impactu na sociedá asturiana. 

S.O.S. Llingua Asturiana
La Llingua Asturiana
L'asturianu ye la llingua propia d'Asturies y de parte de Lleón, Zamora y Miranda del Douru . Tien el so orixe, lo mesmo que les distintes llingües romances peninsulares na francedura que la unidá llatina sufrió na edá media. Hestoricamente la llingua asturiana foi xunta al reinu d'Asturies (718-910) y la so continuación hestorica; el reinu astur-lleonés o lleonés. El consideráu primer documentu en llingua asturiana, el Fueru d'Avilés, ye del sieglu XII. Dende'l sieglu XIV, cola dependencia d'Asturies de Castiella produzse la castellanización de la documentación. Nel sieglu XVII entamen a apaecer testos lliterarios n'asturianu y nos sieglos XVIII y XIX hai dellos movimientos d'intelectuales y escritores que lluchen pola defensa de la llingua. Nos años 70 entama'l modernu movimientu de recuperación llingüística. Una encuesta fecha pol gobiernu asturianu nel añu 1991 amuesa que'l 36% de los asturianos consideren al asturianu la so primer llingua. L'asturianu nun ye oficial na Comunidá Autónoma del Principáu d'Asturies. Anque´l so Estatutu d'Autonomia diz que debera ser promovíu y protexíu.
Una Llamada
La Xunta fai una llamada a la sociedá asturiana ente la grave situación na que s'alcuentra'l nuesu dioma. Creyemos que ye hora d'intervenir de manera radical pa camudar l'actual situación de la llingua asturiana, qu'esmorez estancada nos pocos llogros algamaos nos últimos quince años, ente'l despreciu de les instituciones oficiales y la indiferencia de la mayoría de la sociedá. 
Un Movimientu
La sobrevivencia de la llingua y la cultura d'Asturies precisa la intervención, con más rixu que nunca, del movimientu cívicu reivindicativu que la Xunta encabeza. Nesi sen paeznos primordial y verdaderamente urxente dinamizar el movimientu de vindicación llingüística n'Asturies, que d'unos años p'acó manifiesta unos mínimos vitales esmolecedores, y dar los pasos precisos pa asitiar la cuestión llingüística nel centru de les moliciones de la sociedá asturiana, sacándola del estatus marxinal que - nun nos engañemos- entá tien anguaño. 
Un Determín
Esti (a)saltu al cogollu de la sociedá hai que lu facer yá, dende la esperiencia de toos estos años de llabor más o menos granao, con un determín claru d'espardimientu, y desenvolviendo una capacidá de trabayu muncho más grande que l'actual. Otra manera, nun podremos encarar les mui diferentes estayes que tenemos delantre y nes que ye preciso intervenir con urxencia 
Una Convicción
Na Xunta tenemos la convicción de que'l futuru de la llingua y la cultura d'Asturies depende de que'l conxuntu de la sociedá asuma la so defensa, y creyemos que'l trabayu bien organizao d'unes pocos y unos pocos pue facer muncho por ello. 
¡Ya Valió!
Yá valió de tar a la espectativa, reaicionando ante les agresiones y los fechos consumaos, ye tiempu de qu'un movimientu social ampliu de vindicación llingüística garre la iniciativa de la recuperación y la normalización de la llingua d'Asturies Por too ello, fai falta'l to apoyu al movimientu de recuperación del asturianu. 
Xunta pola Defensa de la Llingua Asturiana (Ochobre 1995) 
¡Entá tamos a tiempu de salvar la llingua d'Asturies! 

¿Qué queremos ? 
Escolarización
La Xunta quier que la implantación del deprendimientu de la llingua algame tolos centros de mou inmediatu, aprovechando a lo másimo les posibilidaes llegales actuales (optatividá, voluntariedá,...) y lluchando por un cambéu nesi marcu qu'abria nueves opciones. 
Medios de Comunicación
La presencia nos medios de comunicación ye básica pal procesu de normalización social d'una llingua. Güei l'apaición de la nuesa llingua nestos medios ye meramente testimonial. L'apaición de les televisiones locales, la posibilidá d'una televisión autonómica nun futuru prósimu, los centros territoriales de les cadenes de radio y les radios llibres ofrécennos calces pa la salida de la llingua a un públicu masivo que nun podemos dexar que se desaprovechen. Tenemos la intención de collaborar con emisores pa caltener y enanchar l'horariu d'emisiones n'asturianu, contactar con TVE pa emitir programación n'asturianu, apoyar les iniciatives a favor d'una RTVAS qu'use la llingua asturiana... 
Toponimia
El nuesu trabayu diríxise a algamar que los conceyos, l'alministración asturiana y el Ministerio de Fomento almitan los nomes tradicionales y verdaderos de los llugares, y que seyan estos los únicos que s'usen. Tamién esiximos que se reactive la Xunta de Toponimia. Mentres eso nun se llogre, y ensin escaecer qu'esi ye'l meyor camín, nun hemos dexar de llau vieyos vezos d'igua artesanal d'esa parte del paisaxe del país. 
Oficialidá
Los drechos llingüísticos de les asturianes y los asturianos vense tarazaos pola redaición restrictiva del artículu 4 del Estatutu d'Autonomía p'Asturies, que nun-y reconoz a la nuesa llingua la condición de llingua oficial. Sabemos que la única manera de garantizar esos drechos ye algamar la oficialidá. 
Normalización Social
Pero la garantía de los drechos de los y les falantes nun ye too pa la permanencia y l'esporpolle d'una llingua. Ye preciso asegurar la plena normalización social del asturianu, la so presencia social normal y constante, que faiga posible la dignificación de la llingua y la so sobrevivencia. 


¿Qué Facemos?
La Xunta pola Defensa de la Llingua Asturiana desendolca a lo llargo del añu diverses actividaes. Conciertos, manifestaciones, publicación de llibros, campañes de concienciación, trabayos de traducción p'asociaciones y Conceyos, organización d' alcuentros, ... Too esto camín de la oficialidá y de la normalización social de la nuesa llingua. 


Sofita la Xunta ¡Afiliate! 
Los retos que tien plantegaos la Xunta y la situación de la llingua precisen planteamientos teóricos, operativos y económicos nuevos, que faigan que la presencia de la Xunta seya muncho mayor a tolos niveles: apaición constante nos medios de comunicación, establecimientu d'una rede de contautu internu, organización de campañes populares de reivindicación y normalización social de la llingua, collaboración ente les diferentes sociedaes y entidaes dedicaes a la proteición de la llingua y la cultura asturianes, promoción de la llingua asturiana a nivel internacional,... 
Si quies ponete en contautu con nos : 
xunta@asturies.org