Entrevista col portavoz de la Xunta pola Defensa de la Llingua Asturiana

* El Príncipe amosó respetu y sensibilidá pa cola llingua asturiana 
* L'acuerdu del Conseyu d'Universidaes tomóse sabiendo que yera inxustu 
* Col PP nel Gobiernu nun hai nengún cambiu 
El pasáu 28 d'ochobre, el Príncipe Felipe, qu'asistía n'Uviéu a les entregues de los Premios Internacionales que lleven el so nome, dedicaba'l día a diverses audiencies con persones y coleutivos que representen estremaos aspeutos de la vida asturiana. Esi día, ensin que tuviere previsto de mano, recibió a cuatru representantes de la Xunta pola Defensa de la Llingua Asturiana, organización ciudadana fundada nel añu 1982, que de magar entós ye ún de los grupos más activos na reivindicación llingüística. 
Xustamente, el día anterior la XDLA convocaba, a comuña con partíos y sindicatos, una xuntanza de protesta n'Uviéu, contra l'actitú llamentable del Conseyu d'Universidaes, que, aconceyáu en Madrid, invalidó'l determín tomáu pola Universidá d'Uviéu, nel sentíu d'incluyir l'asignatura de Llingua Asturiana comu una de les optatives nes carreres de Filoloxía. 
Falamos con Fernando Álvarez-Balbuena, portavoz de XDLA. 
- ¿Cómu surdió la idea de la solicita-y al Príncipe que vos recibiere? 
- Depués del escandalosu determín tomáu pol Conseyu d'Universidaes, qu'a tol mundu-y paeció una ofensa a Asturies y un insultu a l'autonomía universitaria, la Xunta pola Defensa de Llingua entamó una campaña urxente pa tentar de dar una respuesta curiosa, pa poner d'acuerdu a la xente que, comu nós, taba indignao, y pa llamar l'atención de la opinión pública. Aprovechando la presencia del Príncipe Felipe n'Asturies, y sabiendo que yá hubiera muestres de la so sensibilidá pola llingua y cultura asturianes, pensemos que yera bona idea mirar de face-y la nuesa denuncia de los últimos casos d'ataque al asturianu. 
- ¿Qué vos paeció cuandu vos llegó la comunicación de que vos recibía? 
- La verdá ye que, teniendo en cuenta que solicitemos la entrevista'l miércoles y que'l Príncipe yá tenía tresnada l'axenda d'actos y audiencies, foi una sorpresa pa toos que quixiera recibinos con esa urxencia. 
- ¿Qué-y dixistis nesa audiencia? 
- Queríemos qu'entendiere que les nueses son unes reivindicaciones xustes y democrátiques que cualquier persona con un mínimu de xacíu y tolerancia pue entender y compartir, y que son unos pocos intransixentes los que de contino tán poniendo enzancos y faciendo maniobres pa impedir la dignificación y normalización de la llingua, cosa que nun trai más que conflictos y incomodu ente la xente. Pa que viera parte del llabor que se taba faciendo y conociera'l sentir del pueblu asturianu, regalémos-y los últimos llibros de testu de l'asignatura d'asturianu, y tamién l'informe sociollingüísticu p'Asturies del profesor Francisco Llera Ramo, tituláu Los asturianos y la lengua asturiana. 
- Llueu de les vuestres pallabres, ¿qué vos dixo'l Príncipe? 
- Recordónos que la Fundación <<Príncipe d'Asturies>> apoyaba l'asturianu, na midida de les sos posibilidaes. En tou momentu, el Príncipe amosó una actitú de respetu y sensibilidá pa col tema de la llingua asturiana, y interesóse poles causes d'esi conflictu social del que-y falemos. 
- Dende'l puntu de vista de la Xunta pola Defensa de la Llingua Asturiana, ¿qué significáu-y dais a esa audiencia col Príncipe? 
- De mano, hai que valorar que'l mesmu fechu de recibinos fuera de los previsto y que la entrevista tuviera motivada pol acuerdu vergonzosu del Conseyu d'Universidaes, yá significa daqué mui importante. Después, hai que resaltar el papel exemplar qu'eso pue tener pa dellos sectores influyentes, a los que se-yos enllena'l papu falando del Príncipe comu exemplu p'Asturies, pero que depués nun lo tienen tan claro cuandu hai qu'apostar pola defensa de la llingua d'esa Asturies a las que dicen estimar. 
- ¿Pue valir pa iguar dalgún de los problemes con que s'atopa la dignificación social de la llingua asturiana? 
- Vuelvo a insistir no que tien d'influencia social, de modelu prestixosu. Que dende les más altes instancies del Estáu se reciba a una organización lluchadora y reivindicativa comu la Xunta pola Defensa de la Llingua y que depués equí nos dexen de llau, tien que facer pensar a dellos políticos. 
- ¿Ónde tán agora les mayores torgues pal xorrecimientu normal del asturianu? 
- Comu ye natural, después d'audiencies, xuntances de protesta, tovía siguen ehí. Y ye que les soluciones son polítiques. Esi ye'l problema principal: los gobernantes asturianos nun recueyen lo que ye un sentir mayoritariu del pueblu asturianu y sigue dándo-yos perceguera sacar a la llingua de la situación precaria na que ta. Si se regulara llegalmente'l compromisu de les instituciones na promoción y defensa del asturianu cola oficialidá y una Llei de Normalización Llingüística, podría facese lo que güei nun se fai: xeneralización de la escolarización de la llingua, iguadura de a toponimia, medios de comunicación públicos n'asturianu, derechos llingüísticos reconocíos, etcétera. 
- ¿Qué oxetivos vos marcáis d'agora en delantre? 
- Pel momentu vamos tar sollertes sol asuntu del Conseyu d'Universidaes, a ver cuála ye l'actitú del Rector y les midíes que se tomen dende Asturies. Los nuesos servicios xurídicos tamién tán estudiando una demanda por prevaricación, yá que pensamos que l'acuerdu del Conseyu d'Universidaes tomóse sabiendo que yera inxustu. 
- Dende va meses, Asturies tien un gobiernu del Partíu Popular. ¿Nótase daqué cambiu na política llingüística respeutu del asturianu? 
- Non, hasta agora la política paez ser aguardar a nun se sabe qué, a nun facer nada y dexalo morrer too. El Serviciu de Política Llingüística nun lu quitaron, pero nun paez qu'haya nenguna iniciativa pa dotalu d'actividá. Les declaraciones de la señora Conseyera falando d'estudiar la cuestión de la oficialidá foron una sospresa pa toos, pero ta claro que ye más un fallu nunes declaraciones que la realidá política del PP. Pa qué nos vamos engañar... 

Entrevistó: Ramón d'Andrés