GEBED AAN DANIE & ELSABÉ


OP HUL HUWELIKSBEVESTIGING
Liefdevolle Vader, dit is ons diep en innige gebed
Dat Danie en Elsabé deur gans hul lewens, op U, O God mag let
Om hul met U liefde en krag te onderskraag
Met elke tree wat hul op hul huweliksweë mag waag.
Mag hul nooit in hulself roem
Maar altyd eerste U naam noem
Verhoed dat selfsug ooit in hul lewens mag regeer
Maar leer hul om mekaar met toegewing en eerbied te respekteer
Laat hul ten alle tye beginselvas wees
Geïnspireer deur U Heilige Gees
Wanneer U in die môre die son oor hul laat verrys
Laat hul U eerste met 'n loflied in die hart prys
En wanneer die son weer oor hul ondergaan
Wil U, self oor hulle die wag kom staan
Wil U hul besonder krag en genade gee
Om mekaar se sorge te dra op hulle lewensweë




Gee dat hul aan mekaar getrou mag bly
Totdat U hul deur die dood mag skei
Mag hul in Christus 'n ware heenkome vind
En wil U so hul nou vir ewig aan mekaar verbind.
GEBED AAN MICHAEL & MARISA
OP HULLE HUWELIKSDAG
Liefdevolle Heer
Waar U nou vir Michael en Marisa saamvoeg as man en vrou
Laat hul saam U heilige naam aanroep en daarop voortbou
Wil U self hul as U kinders in besit neem
En vir hul oplos elke huweliksprobleem
Laat niemand ooit hul huwelik skaad
Maar leer hul om te luister na U goddelike raad
Mag hul altyd eerbied en respek teenoor mekaar betoon
En mag hul so in vrede en ware liefde saamwoon
Gee dat hul met diepe ootmoed hul voor U mag neerbuig
En bereid mag wees om altyd vir U te getuig
Laat hul ten alletye na U opsien
En gee hul die vermoë om U getrou te dien
Laat hul nooit in hulself roem
Maar altyd blymoedig eerste U naam noem
Laat hul vir ewig aan mekaar getrou bly
Totdat die dood hul van mekaar mag skei
Wil U hul nou elkeen by die hand vat
En hul saam lei op hul huwelikspad
Laat U seën vir ewig op hul rus
En maak hul deur U Heilige Gees
Daarvan bewus
Heer gaan nou met hul saam
Ons vra dit in U heilige naam.
Amen